Tref arfordirol yw Llanelli, ac fel canolfan ar gyfer teithio o amgylch Gorllewin Cymru mae'n ddelfrydol. Mae Penrhyn hardd Gwyr, Bannau Brycheiniog a Pharc Cenedlaethol Arfordir Sir Benfro oll yn hawdd i'w cyrraedd mewn car oddi yma. Parc Gwledig Pen-bre Ar Fae Caerfyrddin sydd i'r gorllewin o Lanelli, ceir cymysgedd gwych o lan y môr, coetir a chefn gwlad bryniog, yn ogystal â thref hanesyddol Cydweli â'i chastell hynafol a phenrhyn Pen-bre - aceri maith o draeth, twyni a choedwig. Mae'r ardal hon yn cynnig nifer o gyfleusterau i ymwelwyr gan gynnwys harbwr Porth Tywyn, ar gyfer hwylio a physgota, a Maes Golff Ashburnham sydd o safon pencampwriaeth. Y prif atyniad er hynny yw Parc Gwledig Pen-bre, sy'n denu dros 300,000 o bobl y flwyddyn i fwynhau heddwch a llonyddwch coedwig Pen-bre a thraeth saith milltir Cefn Sidan. Arferai fod yn safle i Ffatri Arfau'r Goron ond fe'i prynwyd gan yr awdurdod lleol ym 1977. Bellach mae wedi ei drawsnewid yn gyfan gwbl yn barc gwledig glan-môr gwych sy'n cynnig traeth godidog, coedwig, safleodd picnic, llethr sgïo sych, llwybr tobogan, a chwrs taro a phytio. Mae yna hefyd doreth o safleoedd parcio ceir, Canolfan Ymwelwyr a bwyty (Ffôn 01554 - 833913). Maes Awyr Pen-bre Ar safle cyfagos ychydig i'r gogledd mae cyn Faes Awyr Pen-bre sydd wedi'i ddatblygu yn Ganolfan Chwaraeon Modur Cymru ar gyfer Fformiwla 3, rasys awtocros, certio a champau modur eraill. Mae ardal coedwig Pen-bre yn y canol yn berffaith i'r rhai sydd eisiau mwynhau tawelwch y goedwig a'r twyni.   Cydweli Mae'n werth ymweld â chastell a thref Cydweli os oes gennych ddiddordeb mewn hanes. Mae'r castell cyntaf yn dyddio'n ôl i 1106, ac erbyn y 14eg ganrif dyma oedd porthladd prysuraf de Cymru. Mae yma eglwys hanesyddol yn ogystal a adeiladwyd yn y 13eg ganrif i wasanaethu'r Priordy Benedictaidd. Mae amgueddfa ddiwydiannol wedi'i datblygu ar hen safle gweithfeydd tunplat Cydweli.   Parc Arfordirol y Mileniwm Daeth Llanelli yn wir i'r amlwg wrth ddathlu'r mileniwm newydd pan agorwyd Parc Arfordirol unigryw y Mileniwm. Mae'r prosiect mawreddog £27.5 miliwn yma wedi trawsnewid ac ychwanegu at 22 cilomedr o'r morlin sy'n ymestyn o bont Casllwchwr yn y dwyrain i Barc Gwledig Pen-bre yn y gorllewin, wedi diogelu cynefin bywyd gwyllt gwerthfawr ac wedi annog pobl i brofi a mwynhau byd natur. Agorwyd y Parc Arfordirol yn swyddogol gan ei Mawrhydi'r Frenhines ar 12fed Mehefin, 2002 yn ystod taith ei Jiwbili Aur. Mae'n cynnwys nodweddion fel 200 erw o gynefin gwlyptir (gan helaethu Canolfan Adar y Gwlyptir boblogaidd Penclacwydd - Ffôn 01554 741087 - sydd wedi ei modelu ar Ganolfan enwog Syr Peter Scott yn Slimbridge, Sir Gaerloyw), canolfan chwaraeon dwr, llynnoedd pysgota bras, dwy bont dir enfawr, coedwigoedd cymunedol, safle cynnal digwyddiadau a gweithgareddau awyr agored (lle cynhaliwyd Eisteddfod Genedlaethol 2000), celfyddydweithiau cyhoeddus a chwrs golff wedi ei gynllunio gan Jack Nicklaus sydd i fod i'w gwblhau yn 2003. Cysylltir yr holl nodweddion ac adnoddau yma gan lwybr cerdded a beicio di-dor y gallwch ymuno ag ef mewn sawl man strategol ar hyd y Parc. (Rhif Ffôn Swyddfa Prosiect Parc Arfordirol y Mileniwm - 01554 777744). Canolfan Hamdden Llanelli Mae safle hamdden wedi'i ddatblygu ym Mharc y Bobl yng Nghilgant y Parc sy'n cynnwys Pwll Nofio'r Jiwbilî a agorwyd yn wreiddiol ym 1963 ac sydd wedi'i adnewyddu'n llwyr. Mae'n cynnwys prif bwll 25 metr gyda slefr hydrolig, pwll i ddechreuwyr, bath Spa, gwelyau haul, gwasanaeth tylino a swît sauna moethus. Mae'r cyfleusterau canolfan hamdden integredig yn cynnwys neuadd chwaraeon aml-bwrpas ar y llawr isaf sy'n gallu cynnwys dau gwrt tennis maint-llawn o safon ryngwladol, a'r rhain yn troi'n wyth cwrt badminton, campfa codi pwysau yn llawn offer, dau gwrt sboncen, cyfleusterau meithrinfa ar gyfer babanod hyd at ddwy flwydd oed, a rhai ar gyfer plant 2-5 mlwydd oed yn gysylltiedig â man chwarae allanol. Ar yr ail lawr mae dwy ystafell ddigwyddiadau, siop, a balconïau gwylio. Ar y trydydd llawr ceir bar lolfa trwyddedig, caffi, a balconïau gwylio. Mae cyfleusterau lifft yn sicrhau y gall pobl fethedig ddefnyddio'r holl safle. (Ffôn 01554 774757). Canolfan Bowlio Dan-do Selwyn Samuel Y drws nesaf i'r ganolfan hamdden mae Canolfan Selwyn Samuel sy'n cynnwys chwe lawnt fowlio dan-do a chyfleusterau bwyty a bar. Mae'r Ganolfan ar agor saith diwrnod yr wythnos drwy gydol y tymor bowlio dan-do (Medi - Ebrill). Mae llawer o gystadlaethau bowls cenedlaethol a rhyngwladol wedi eu cynnal yno, a rhai ohonynt wedi eu dangos ar y teledu (Ffôn 01554 776506). Yn ystod cyfnod egwyl yr haf o Fai hyd ganol Medi, defnyddir y Ganolfan ar gyfer ystod o weithgareddau gan gynnwys cyngherddau, arddangosfeydd, a.y.b. gyda llawr 12,000 troedfedd sgwâr. Mae ganddi'r holl offer priodol a system oleuo llwyfan modern, llwyfan rhenciog a stoc o gadeiriau ar gyfer uchafswm o 1,200 o bobl. Mae'r Ystafell Lliedi cyfagos yn darparu ar gyfer derbyniadau priodas, ciniawau, digwyddiadau, a.y.b. gydag offer disgo modern a llawr dawnsio. (Ffôn 01554 775135).